దిశ, డైనమిక్ బ్యూరో: కార్పొరేట్ సంస్థలకు పన్ను రాయితీలు ఇచ్చాం.. మరి ఉద్యోగాలేవి? జీతాల పెంపు ఏది? అంటూ ప్రధాని నరేంద్ర మోడీ భారతీయ పారిశ్రామిక దిగ్గజాలను సూటిగా ప్రశ్నించారు.కార్పొరేట్ పన్ను రేటును 30 శాతం నుంచి 22 శాతానికి తగ్గించామని, కొత్త పన్ను విధానంలో వ్యక్తిగత ఆదాయపు పన్నును రూ.12 లక్షల వరకు పూర్తిగా మినహాయించామని తెలిపారు. ‘మీరు ఎప్పుడూ మరిన్ని రాయితీలు కావాలని అడుగుతూనే ఉంటారు. కానీ, అందుకు తగ్గట్టుగా మీరు ఎక్కువ మంది ఉద్యోగులను నియమించుకున్నారా? మీ సంస్థల్లో పనిచేస్తున్న ఉద్యోగుల జీతాలను పెంచారా?’ అంటూ ప్రధాని నిలదీశారు. గురువారం న్యూఢిల్లీలోని భారత్ మండపంలో జరిగిన ఫెడరేషన్ ఆఫ్ ఇండియన్ ఛాంబర్స్ ఆఫ్ కామర్స్ అండ్ ఇండస్ట్రీ (FICCI) శతాబ్ది ఉత్సవాల వార్షిక సదస్సును ప్రారంభించిన ప్రధాని, దేశంలోని అత్యున్నత వ్యాపారవేత్తలను ఉద్దేశించి కీలక ప్రసంగం చేశారు. పన్ను రిటర్నులు, రీఫండ్లను సులభతరం చేశామని, గతంలో 8 నెలలు పట్టే రీఫండ్లు ఇప్పుడు వారం రోజుల్లోనే వస్తున్నాయని పేర్కొన్నారు.
‘ఇండియా ఫస్ట్’ మంత్రం పాటించాలి:
వచ్చే 20 ఏళ్లలో పారిశ్రామికవేత్తలు తీసుకునే ప్రతి దీర్ఘకాలిక పెట్టుబడి నిర్ణయానికి ‘ఇండియా ఫస్ట్’ (India First) అనేదే పునాది కావాలని ప్రధాని మోడీ పిలుపునిచ్చారు. దీనివల్ల దేశం ఆత్మనిర్భర్గా మారడమే కాకుండా, వ్యాపార వృద్ధికి కొత్త అవకాశాలు లభిస్తాయన్నారు. వందేళ్ల ప్రస్థానాన్ని పూర్తి చేసుకున్న ఫిక్కీని అభినందించిన ప్రధాని.. మారుతున్న కాలానికి అనుగుణంగా దేశ ఆర్థిక ప్రయాణంలో ఫిక్కీ కీలక పాత్ర పోషించిందని కొనియాడారు.
50 కోట్ల మంది పేదరికం నుంచి బయటపడ్డారు:
గత వందేళ్లలో భారత ఆర్థిక వ్యవస్థ ఎన్నో ఒడిదుడుకులను చూసిందని ప్రధాని ఈ సందర్భంగా గుర్తుచేశారు. లైసెన్స్ కోటా రాజ్, జాతీయీకరణ వైఫల్యాలు, 21వ శతాబ్దంలో ‘ఫ్రాజైల్ ఫైవ్’ (బలహీన ఆర్థిక వ్యవస్థలు) జాబితాలో ఉన్న భారత్.. గత 12 ఏళ్లలో యువత, రైతులు, కార్మికులు, పారిశ్రామికవేత్తల కృషితో నేడు ప్రపంచంలోనే అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థగా (సుమారు 7 శాతం వృద్ధి రేటుతో) అవతరించిందన్నారు. గత నెలలో భారత వస్తువుల ఎగుమతులు దాదాపు 50 బిలియన్ డాలర్లకు చేరుకుని ఆల్ టైమ్ రికార్డు సృష్టించాయని తెలిపారు. తాజా ప్రపంచ బ్యాంక్ నివేదిక ప్రకారం.. కేవలం 12-13 ఏళ్లలోనే 50 కోట్ల మంది భారతీయులు పేదరికాన్ని జయించారని ప్రధాని వివరించారు.