దిశ, వెబ్డెస్క్: డీజిల్లో బయోడీజిల్ కలిపే ప్రక్రియపై వస్తున్న ఊహాగానాలకు ప్రభుత్వ రంగ చమురు మార్కెటింగ్ సంస్థలైన ఐఓసీఎల్, బీపీసీఎల్, హెచ్పీసీఎల్ తెరదించాయి. ప్రస్తుత ఆర్థిక సంవత్సరం (2026–27) ఏప్రిల్ నుంచి సెప్టెంబర్ వరకు దేశవ్యాప్తంగా డీజిల్లో సగటు బయోడీజిల్ బ్లెండింగ్ కేవలం 0.08 శాతం మాత్రమే నమోదైందని హిందుస్థాన్ పెట్రోలియం కార్పొరేషన్ లిమిటెడ్ ‘X’ వేదికగా అధికారికంగా వెల్లడించింది.
డీజిల్ విక్రయాలు, బ్లెండింగ్ గణాంకాలు ఇలా..
2026–27 ఆర్థిక సంవత్సరం తొలి 6 నెలల్లో PSU OMCs డీజిల్ విక్రయాలు, బ్లెండింగ్ వివరాలను హెచ్పీసీఎల్ వెల్లడించింది. ఈ కాలంలో మొత్తం హై-స్పీడ్ డీజిల్ విక్రయాలు సుమారు 4,900 కోట్ల లీటర్లు ఉండగా, ఇందులో 4,700 కోట్ల లీటర్లకు పైగా డీజిల్లో ఎలాంటి బయోడీజిల్ కలపలేదు. మిగిలిన సుమారు 200 కోట్ల లీటర్ల డీజిల్లో మొత్తం 4 కోట్ల లీటర్ల బయోడీజిల్ కలిపారు. మొత్తం విక్రయాలతో పోలిస్తే ఇండస్ట్రీ స్థాయిలో బయోడీజిల్ బ్లెండింగ్ శాతం కేవలం 0.08 శాతం వద్దే నిలిచింది.
ఫీడ్స్టాక్ సవాళ్లు..
2022లో సవరించిన ‘నేషనల్ పాలసీ ఆన్ బయోఫ్యూల్స్ – 2018’ ప్రకారం, 2030 నాటికి 5 శాతం బయోడీజిల్ బ్లెండింగ్ను సూచిక లక్ష్యంగా నిర్దేశించారు. అయితే బయోడీజిల్ తయారీకి అవసరమైన ముడి పదార్థం పరిమితంగా అందుబాటులో ఉండటం వల్ల వాస్తవ బ్లెండింగ్ లక్ష్యం కంటే చాలా తక్కువగా ఉంటోంది. గడిచిన 2025–26 ఆర్థిక సంవత్సరంలో OMCs సాధించిన మొత్తం బయోడీజిల్ బ్లెండింగ్ స్థాయి కూడా కేవలం 0.18 శాతం మాత్రమేనని హచ్పీసీఎల్ పేర్కొన్నది. ఇక ప్రపంచవ్యాప్తంగా ఆయా దేశాల్లో లభించే ఫీడ్స్టాక్ ఆధారంగా బయోడీజిల్ బ్లెండింగ్ కార్యక్రమాలు అమలవుతున్నాయని హెచ్పీసీఎల్ గుర్తుచేసింది. ఇండోనేషియా, మలేషియా, బ్రెజిల్ వంటి దేశాల్లో 10 శాతం నుంచి 50 శాతం వరకు బ్లెండింగ్ జరుగుతోందని పేర్కొన్నారు.